(১)
দয়ানন্দবীরো যতির্ভাতু শশ্বদ্
গুণানাং নিধির্বেদ-শাস্ত্রোপদেষ্টা ।
সদা সংয়মে রক্তধীর্ধীর-চেতাঃ
বরেণ্যঃ শরণ্যো মুনিঃ সাধুবৃত্তঃ ॥ দয়ানন্দ০ ॥
( ২ )
সদা ধর্মভক্তঃ সদা দেশভক্তঃ
সদা দীন-হীনাঽঽর্তি-নাশানুরক্তঃ ।
স্বদেশব্রতো দেশভক্ত্যেক-মূর্তিঃ
স্বদেশাভিমানেন সন্দোপ্তমূর্তিঃ ॥ দয়ানন্দ০ ॥
( ৩ )
সদা দেশচিন্তা, সদাঽনাথ - চিন্তা
দরিদ্রাতুরাণাং সমুদ্ধার-চিন্তা ।
গবাং যোষিতাং দুঃখ-নাশস্য চিন্তা
সদা যস্য চিত্তে স দেবো বদান্যঃ ॥ দয়ানন্দ০ ॥
( ৪ )
ন যস্যাস্তি চিত্তে ভয়ানাং বিভীতিঃ
ন রোষাগ্নি- দাহো ন বা শোক- শোষঃ ।
ন যত্রাস্তি চিন্তা স্বদেহস্য জাতু
সদা দেশচিন্তা-নিমগ্নঃ স ধন্যঃ ॥ দয়ানন্দ০ ॥
( ৫ )
ঋষীণাং মুনীনাং সদাঽঽদর্শ-পাতা
স্ববিত্তস্য দাতা, স্বদেহস্য দাতা ।
সদা মাতৃভূমেঃ সুরক্ষাঽনুরক্তো
বিদেশীয়-ধর্মে প্রহারানুরক্তঃ ॥ দয়ানন্দ০॥
(৬)
সদৈবাঽঽঙ্গ্লভাষাং সৃতিং খণ্ডয়ন্ সঃ,
সদা ভারতীয়ং মতং মণ্ডয়ন্ সঃ ।
চরিত্রাভিমানং সদা দর্শয়ন্ সঃ
স্বদেশানুরাগে রতো ধর্ম-ধুর্যঃ ॥ দয়ানন্দ০ ॥
( ৭ )
স্বদেশীয়-রাজ্যং মতং সর্বশ্রেষ্ঠং
বিদেশীয়-রাজ্যং সদাঽনর্থকারি ।
স্বদেশীয় - রাজ্যে সুখং শান্তিরিষ্টা
সদা স্বাভিমানং বিকাসোন্নতী চ ॥ দয়ানন্দ০ ॥
( ৮ )
কুরীতিঃ সদা দুঃখদ্বন্দ্বাদি-কর্ত্রী
কুনীতিঃ সদা মানবাঽঽচার- হর্ত্রী ।
সদৈবাঽন্ধবিশ্বাস-মূলা অনর্থাঃ
বদন্ দেশহেতোঃ পপৌ যো বিষং চ ॥ দয়ানন্দ০ ॥
( ৯ )
সদা যোষিতাং মান-রক্ষাঽবসক্তঃ
সদা দেশ- স্বাতন্ত্র্য কার্যানুরক্তঃ ।
সদা আর্য-ধর্ম-প্রচারানুরাগী
বিরাগী ব্রতী বিশ্ববন্ধুত্ব -মানী ॥ দয়ানন্দ০ ॥
( ১০ )
মুদা দুঃখজাতং প্রসেহে পরার্থং
জহৌ দেশহেতোঃ সুখং চার্থজাতম্ ।
সদা ক্রান্তি-সন্দেশদং তং নতোঽহং
সদা মাতৃভূ-দত্ত-চিত্তং শ্রিতোঽহম্ ॥ দয়ানন্দ০ ॥
