(১)
নমামি মূলশঙ্করং
দয়াঽঽকরং গুণাঽঽকরম্ ।
প্রভাঽঽকরং সুধাঽঽকরং
সমস্ত-লোক-ভাস্করম্ ॥ নমামি০॥
(২)
স্ব-জ্ঞান-দীপ্তি-ভাস্বরং
গুণ-প্রভা -বিকস্বরম্ ।
স্ব-যোগ-রোচিষাঽঽবৃতং
তপো - বিধূত -কল্মষম্ ॥ নমামি০॥
(৩)
মহর্ষি - বৃন্দ - বন্দিতং
শ্রুতের্নিনাদ-নন্দিতম্ ।
অনাথ - নাথমাশ্রয়ং
সদা সদার্য-সংশ্রয়ম্ ॥ নমামি০॥
(৪)
ভজে - গুণৈক - মানিনং
শ্রুতি - প্রভৈক - ধ্যায়িনম্ ।
ভবাঽব্ধি - দোষ - পায়িনং
সুখৌঘ- শান্তি - দায়িনম্ ॥ নমামি০॥
(৫)
তমোঽপহং রজোঽপহং
অজস্রমাত্ম-দোষ-হম্ ।
তপ-প্রপূত-মানসং
অনার্য-বৃন্দ-শাসনম্ ॥ নমামি০॥
(৬)
শ্রয়ে গুণোচ্চয়াঽঽশ্রয়ং
মনোজ-ভাব-সংশ্রয়ম্ ।
ভবাঽব্ধি-দুঃখ-বারকং
অশেষ-দোষ-হারকম্ ॥ নমামি০॥
(৭)
শ্রুতি-স্মৃতি-প্রচারকং
সদাঽঽর্য-বর্ত্ম ধারকম্ ।
দরিদ্র-দীন-তারকং
গুণ-প্রভা-প্রসারকম্ ॥ নমামি০॥
(৮)
ত্বদঙ্ধ্রি-পদ্ম-সেবনং
সমস্ত-শোক-শোষণম্ ।
অশেষ-দোষ-দূষণং
সুখৌধ সিন্ধু পোষণম্ ॥ নমামি০॥
(৯)
গুণাঽশ্রয়ং প্রভাঽঽশ্রয়ং
সমস্ত-গৌরবাঽঽশ্রয়ম্ ।
পরার্থ-ত্যক্ত-বিগ্রহং
ত্বিষা-প্রদীপ্ত-বিগ্রহম্ ॥ নমামি০॥
(১০)
নমামি লোক-লোচনং
স্ফুরৎপ্রভা-প্ররোচনম্ ।
সুধী-প্রবীর-রঞ্জকং
সমস্ত-দোষ-ভঞ্জকম্ ॥ নমামি০॥
ইতি দয়ানন্দস্তবঃ সম্পূর্ণঃ ।
