দয়ানন্দঃ স্বামী জয়তি ভুবনে ভাস্কর-রুচিঃ
[ মহর্ষি স্বামী শ্রীমদ্দয়ানন্দ সরস্বতীর প্রয়াণ তিথি উপলক্ষে নিবেদিত ]
(১)
গুণানামাধারো বিদিত-শ্রুতি-শাস্ত্রার্থ-নিচয়ঃ,
সমুদ্ধর্তা ভর্তা পতিত-জন-চিত্তাঽঽর্তি- হরণঃ ।
শ্রয়ন্নাত্মোৎসর্গং পর-হিত-রতঃ স্বার্থ-বিরতো
( ২ )
'দয়ায়া আনন্দো' বিলসতি গুণানাং সমুদয়ঃ,
'ঋষি' বেদার্থানাং গহন-মননাবাপ্ত-শুভ-ধীঃ ।
শ্রুতীনাং রাদ্ধান্তান্ বিশদয়তি বেদার্থ-বিবৃতৌ,
সরস্বত্যাঃ স্রোতো জয়তি যতিবর্যো গুণনিধিঃ ॥
( ৩ )
অনাথানাং নাথঃ শরণমবলানাং গুণি-গুরুঃ,
বিনেতা ভীতানাং সুপথমুপনেতা চ সুধিয়াম্ ।
শরণ্যো দীনানাং গুণি-গণ-বরেণ্যঃ শ্রুতি-মতিঃ,
দয়ানন্দো যোগী জয়তি ভুবনে ভাস্কর-রুচিঃ ॥
( ৪)
প্রণেতা ভাষ্যাণাং শ্রুতি-গদিত-তত্ত্বার্থ-নিলয়ো
যতিঃ সত্যার্থং যঃ প্রকটয়তি 'সত্যার্থ০'-সুকৃতৌ ।
শ্রুতীনাং তত্ত্বার্থং বিশদয়তি 'ঋগ্ভাষ্য'-বিবৃতৌ
দয়ানন্দো বাগ্মী জয়তি ভুবনে ভাস্কর-রুচিঃ ॥
( ৫ )
ঋষীণাং প্রত্মাং যঃ সরণিমনুসৃত্যাঽঅশু বিদধে
শ্রুতীনাং শিক্ষার্থ গুরুকুল-ততি জ্ঞান-রুচিরাম্ ।
বিরুদ্ধং বেদানাং তদিদমিহ হেয়ং সুপথগৈঃ,
দয়ানন্দো দান্তো জয়তি ভুবনে ভাস্কর-রুচিঃ ॥
( ৬ )
জগন্নেতা ধীরঃ সকল-গুণ-রাশির্বুধ-সুহৃদ্,
নদীষ্ণো বেদানাং জনহিত-কৃত-স্বার্থ-বিরহঃ ।
অবিদ্যায়া ধ্বান্তং ব্যগময়দিহাঽধ্যাত্ম-সুদৃশা
মুনীন্দ্রো ব্যারেজে সকল-সুখ-সৌভাগ্য-সরণিঃ ॥
( ৭ )
সমাজং ত্বার্যাণাং প্রতি-নগরমস্থাপয়দিহ,
সমুন্মূল্যাঽঽমূলং শ্রুতি-বিপথ-পাখণ্ড-নিচয়ম্ ।
সদাদর্শ প্রাচ্যং ভুবি বিনিদধে শান্তি-সুখদং
দয়ানন্দো ধীরো জয়তি ভুবনে ভাস্কর-রুচিঃ॥
(৮)
গবাং রক্ষা কার্যা, পদমনুবিবেয়ং চ সুধিয়াং,
গুণা গ্রাহ্যা হেয়াঃ সততমশিবা দোষ-নিকরাঃ ।
সদাঽঽর্যাণাং ভাষা প্রচরতু ভবে ভব্য-গুণ-ধা,
য এবং ব্যাচখ্যৌ জয়তি স যতির্ভাস্কর-বিভঃ ॥
( ৯ )
জনে হ্যস্পৃশ্যত্বং নহি শ্রুতি-মতং নাপি হিত-কৃদ্,
বিজাতের্জাতেশ্চ বহুবিধ-বিভাগো নহি হিতঃ ।
বিদেশীয়ং রাজ্যং নহি মতিমতাং মান-গুণ-দং,
মনোজ্ঞং স্বাতন্ত্র্যং নিজ-বলি-কৃতেনাপি সুখদম্ ॥
( ১০ )
সুশিক্ষাং নারীণাং, বিবিধ-মত-শুদ্ধিং প্রচলয়ন্,
পদাঽঽক্রান্ত-ত্রাণং বিদধদনিশং জীবন-পণৈঃ।
'সমং লোকং চাঽঽর্যং কুরুত' ইতি লোকানুপদিশন্,
দিবং যাতো জীবত্যমর ইব বন্দ্যো যতিবরঃ ।।
